Double agent - මාතා හාරි

September 05, 2017


මාතා හාරී කියූ සැණින් මතක් වන්නේ ඔත්තුකාරියකි.නමුත් ඇය වෘත්තීය නළගනකි.එසේම විශේෂ පුද්ගලයන් සඳහා කාම වස්තුවක්ද විය(ගණිකා වෘත්තියේ යෙදුණුබව කියවේ).නමුත් ඔත්තු බැලීමේ කාර්යය ඇයට මරු කැදවන බව කිසිදාක නොසිතන්නට ඇති.ප්‍රංශය වෙනුවෙන් සහ ජර්මනිය වෙනුවෙන් ඔත්තු සැපයූ ඈ දෙවන ලෝක යුද සමයේ විසූ ප්‍රසිද්ධතම ඔත්තුකාරිය මෙන්ම ඔත්තු සේවා ඉතිහාසයේ ප්‍රසිද්ධතම පුද්ගලයාද වේ.ජර්මනියට ඔත්තු සපයන බව අනාවරණය වීමත් සමග ඇය වෙඩි තබා මරාදමන්නට නියම විය.මෙම ලිපිය ඔස්සේ ගෙන එන්නේ ඇගේ කතා වස්තුවයි.

මාගරීටා සල් හෙවත් මාතා හාරී නෙදර්ලන්තයේ ලීවුවර්ඩන් හි උපදින්නේ ඇඩම් සල්ගේ පවුලේ වැඩිමහල් දරුවා ලෙසයි.ඒ 1876 අගෝස්තු මස 7 දාය.ඇයට සිටියේ සහෝදරයන් තිදෙනෙකි.ඇගේ පියාට සැලකිය යුතු ආදායම් මාර්ග තිබූ නිසා තම දරුවන්ට හොඳ අධ්‍යාපනයක් දෙන්නට ඔහුට හැකිවිය.ඇය බාලිකා පාසලක වයස අවුරුදු 13 දක්වා උගත්තේය.නමුත් 1889දී ඇගේ පියා බංකොලොත් වීම නිසා ඔහු සහ බිරිද දික්කසාද විය.ඇගේ මව 1891දී මිය යන අතර පියා වෙනත් විවාහයක් කරගනියි.ඉන්පසු මාර්ගරීටා, Visser නැමැත්තෙක් යටතේ ජීවත් වන අතර ගුරුවරියක් වීම සඳහා ඉගෙනීම් කටයුතුවල යෙදුනද එම ආයතනයේ ප්‍රධානියාගේ කරදර නිසා ඉන් ඉවත් වේ.



මාර්ගරීටා ඕලන්ද හමුදා නිලධාරියෙක් රැඩොල්ෆ් මැක්ලිඩ් වන සමග විවාහ වන්නේ 1895 ජූලි 11දාය.විවාහ වූදා ලබාගත් ඡායාරූපයක් පහත දැක්වේ





මාර්ගරීට සහ ඇගේ සැමියා ඇතුලු පිරිස ඕලන්දයේ නැගෙනහිර ඉන්දීය යටත්විජිත වෙත යාත්‍රා කරන අවස්ථාවක්(ඉදිරිපෙල වම් පස මාර්ගරීටා සිටියි)




ඉන්පසු ඇය තම මාමා කෙනෙක් යටතේ ජීවත්වේ.ඕලන්ද යටත් විජිත හමුදාවේ කැප්ටන් කෙනෙක් වන රැඩොල්ෆ් මැක්ලිඩ් නැමැත්තෙක් විසින් සහකාරියක් සෙවීම සඳහා පළකල දැන්වීමකට පිළිතුරු යවන මාර්ගරීටා 1895 ජූලි 11දා ඔහු හා විවාහ වේ.ඔවුන් දෙදෙනාට දාව Norman-John MacLeod නම් පිරිමි දරුවෙක් සහ Louise Jeanne MacLeod නමින් ගැහැණු දරුවෙක් බිහිවේ.මාර්ගරීටා සහ ඇගේ පවුල ජීවත් වූයේ ඕලන්ද යටත් විජිතයක්ව තිබූ ඉන්දුනීසියාවේය.



මාර්ගරීටාගේ දරුවන් දෙදෙනා.වම්පස:Louise Jeanne දකුණුපස:තම පියා සමග සිටින Norman-John




ඇගේ විවාහය සාර්ථක එකක් නොවීය.මාර්ගරීටාගේ සැමියා බේබද්දෙක් වූ අතර ඔහු නිතරම ඇය සමග ආරවුල් ඇති කරගත්තේය.ඔහු මාර්ගරීටාට වඩා අවුරුදු 20ක් වැඩිමහල් අයෙකි.එසේම මැක්ලිඩ් වෙනත් ගැහැණියක් සමගද සම්බන්ධයක් පවත්වාගෙන ගියේය.මේ නිසා මාර්ගරීටා කාලයකට ඔහුව අතහැර දමා තවත් ඕලන්ද ජාතික නිලධාරියෙක් සමග ගියේය,ඉන්පසු ඇය ඉන්දුනීසියානු සම්ප්‍රදායන් ඉගෙනීමට කාලය වෙන්කලාය.දේශීය නර්තන සමාගමකටද ඇය සම්බන්ධ වූවාය.මාර්ගරීටා තමන් 'මාතා හාරී' ලෙස හඳුන්වාගන්නට පටන්ගන්නේ මේ කාලයේදීය.




පසුකාලයේදී ඇය තම නීත්‍යානුකූල සැමියා වෙත පැමිණියද ඔහුගේ කලහකාරී බව වෙනස් වන්නේ නැත.1899දී ඇගේ දරුවන් දෙදෙනාගේ සෞඛ්‍ය තත්ත්වය පිරිහී යයි.එහිදී Norman නම් පිරිමි දරුවා මරණයට පත්වේ.ඉන්පසු මාර්ගරීටා,ඇගේ සැමියා සහ Louise නම් ගැහැණු දරුවා සමග නෙදර්ලන්තයට පැමිණේ.1902 අගෝස්තු මස 30 දා මාර්ගරීටා ඇගේ සැමියාගෙන් දික්කසාද වෙයි.පවුලේ නඩත්තුවට මුදලක් ගෙවන්නට අධිකරණය විසින් මැක්ලිඩ් හට නියම කලද ඔහු එය පැහැර හරියි.මැක්ලිඩ් තම දියණියව ඔහුගේ භාරයේ තබා ගනියි.නමුත් මාර්ගරීටා තම දියණිය ලබාගැනීමට ඔහු සමග නඩු මගට බසින්නේ නැත.වයස අවුරුදු 21 දී උපදංශය උත්සන්න වීම හෝ වෙනත් හේතුවක් මත ඇගේ දියණිය මිය ගොස් තිබේ.


1905 වසරේදී පැරිසියේ කෞතුකාගාරයේ නර්ථනයක යෙදෙන මාතා හාරි





1903දී ඇය ප්‍රංශයේ පැරිස් නගරයට පැමිණේ.එහිදි විදේශීය නාට්‍යාංගනාවක් ලෙස කටයුතු කරයි.ඇගේ නර්ථනයේ විශේෂත්වය වන්නේ ආසියානු හුරුවක් තිබීම සහ තම අඟපසග නිරාවරණය කිරීමයි.තමන් ඉන්දියාවේ ජීවත්වූ බවත් එහිදී දෙවියන් වෙනුවෙන් නර්ථනයේ යෙදුණු බවත් ඇය නිතර කියන්නට විය.එම කාලයේ ඇය අඩ නිරුවත් සහ නිරුවත් ලෙස ඡායාරූපවලට පෙනීසිටි අවස්ථා ගණනාවක් තිබේ.ඇගේ හැසිරීම, දියණිය තමාගේ භාරයේ තබාගන්නට මැක්ලිඩ් හට සාධාරණ හේතුවක් බවටද පත්විය.

උඩුකය ස්වර්ණාභරණවලින් සැරසූ තනපටක් සහිතව පමණක් සිටින මාතා හාරි(1906)




රූසපුවෙන් අඩුවක් නොවූ මාතා හාරී සිය ආසියානු ආභාෂය සහිත නිරුවත් නර්ථනය ඔස්සේ යුරෝපය පුරා ප්‍රසිද්ධියක් හිමිකර ගත්තාය




ප්‍රේක්ෂකයන්ගේ හැඟීම් අවුස්සන සුළු නර්ථන ඉරියව්වල යෙදීම ඇගේ ජනප්‍රියත්වයට හේතුවිය.නර්ථනයේ යෙදෙන විට ඇය තමන් ඇද සිටින ඇදුම් ක්‍රමක්‍රමයෙන් ඉවත් කරයි.අවසානයේදී ඇගේ ශරීරයේ ඉතිරි වන්නේ ස්වර්ණාභරණයෙන් කල තනපටයක් පමණි.එම තනපටයත් නොමැතිව ඇය සිටින්නේ කලාතුරකිනි.ඇගේ පියයුරු කුඩා ඒවා වූ අතර ශරීරය ආවරණය වන ලෙස සමේ වර්ණයට සමාන මේස් ඇඳුම්(bodystocking) පැළද සිටියාය.නමුත් ප්‍රේක්ෂකයා සිතා සිටියේ ඇය සම්පුර්ණයෙන්ම නිරුවත් වන බවයි.

වෙනත් කිසිදු දක්ෂතාවයක් නොතිබූ ගැහැණියක් වුවද තම නිරුවත ප්‍රදර්ශනය කිරීම ඔස්සේ මාතා හාරි දැවැන්ත ප්‍රසිද්ධියක් ලබාගන්නට සමත්විය.






ඇයට තිබුණේ කුඩා ළැමකි.නර්තනයේ යෙදෙන විටදී ඇය කිසිවිටෙක උඩුකය සම්පුර්ණයෙන්ම නිරුවත් නොකලේය.





සිය නර්තන විලාසය ඉන්දුනීසියාවේ සිටියදී ඉගෙන ගත් ඉන්දීය ආභාෂයන් එකතු කර ප්‍රේක්ෂකයන් වශී කරන්නට ඇයට සමත්වූවා පමණක් නොව මිත්‍යාවන්ගෙන් පිරුණු අළුත් ජීවිත කතාවක්ද ඔවුන් ඉදිරියේ කියන්නට විය.




මාතා හාරි සිය නර්තනයන් සඳහා කැපීපෙන සුළු ස්වර්ණාභරණ,ඇඳුම් සහ හිස් පළඳනා භාවිතා කරන ලදි(1910)



ඇය තම සංදර්ශනවලදී නිතර කියූ දෙයක් නම් තමන් ආසියානුවෙක් බවයි.මාතා හාරී තම රංගන ජීවිතය වෙනුවෙන් වෙනමම ජීවිත කතාවක් නිර්මාණය කරගෙන තිබිණි.ඇය කියූ දේවල් සමහරු විශ්වාස කලේ ආසියානු කලාපයේ බොහොමයක් දේවල් සම්බන්ධයෙන් බටහිරයන් ඒ සමයේදී සැලකිය යුතු දෙයක් දැන නොසිටි නිසාය.තමන් ඉන්දියාවේ බ්‍රාහ්මණ පවුල ඉපදුණු බවත් අම්මා දේවාලවල නර්ථනයේ යෙදුණ දේවදාසියක් බවත්,තමන් උපදින විට මව මියගිය බවත් ඇය කියන්නට විය.ඉන්පසු තමන්ද දෙවියන් වෙනුවෙන් කැපවුණු නළඟනක් බවට පත්වූ බව මාතා හාරී ඇගේ නර්ථන ප්‍රසංගවලදී කියා සිටියි.ඇගේ නර්ථන ප්‍රසංග නැරඹීමට හැකිවූයේ ඉහළ පෙළේ පිරිස් වලට පමණක් වුද නිරුවත් නර්ථන ශිල්පිනියක් ලෙස ඇය ලොව පුරා ප්‍රසිද්ධියක් ඉසිලීය.එම කාලයේ ඇය මිලියනපතියෙක් වූ Émile Étienne Guimet ගේ අනියම් භාර්යාව වූ බවටද කටකතා පැතිර ගියේය.

ඇගේ නර්ථන ප්‍රසංගවලදී ආසියානු හුරුවක් සහිත නර්තනයන් සිදුකරන ලදි.




සමහර සංස්කෘතිකායතන ඇගේ නර්ථනය පිළිකුල් කලේය.ඇය නිරුවත පෙන්වනවාට වඩා දෙයක් කරන්නේ නැතිබවත් ,නර්ථනය සම්බන්ධව කිසිදු හැකියාවක්ද නොමැතිබවත් චෝදනා එල්ල විය.1912 පමණ වන විට නළඟනක් ලෙස ඇයට තිබූ ප්‍රසිද්ධිය අඩුවී යන්නට පටන් ගත්තේය.1915 මාර්තු 13 දා ඇගේ අවසන් සංදර්ශනය පැවැත්වූ බව කියවේ.එතැන් පටන් ඇය වෛශ්‍යාවක් ලෙස කටයුතු කරන්නට පටන් ගත් අතර එය බෙහෙවින් සාර්ථක වූයේ පෙර ලබාගෙන තිබූ ප්‍රසිද්ධිය නිසාය.ඇය සමග සම්බන්ධතා පැවැත්වූයේ ඉහළ පෙළේ හමුදා නිලධාරීන්,දේශපාලනඥයින් සහ ධනවත් ව්‍යාපාරිකයින් ඇතුලු පිරිස්ය.ඇගේ සම්බන්ධතාවයන් එක් රටකට සීමා නොවීය.ඇගේ ප්‍රසිද්ධිය නිසා රටකින් රටකට යෑම පහසුවෙන් සිදුකල හැකිවිය.නමුත් සමහරුන් ඇයව දුටුවේ සල්ලාකමේ යන වේස ගෑණියක් ලෙසයි.

මාතා හාරිගේ අත්සන සහිත ඇගේ ඡායාරූපයක්




1915 වසරේ ඇම්ස්ටර්ඩෑම් නගරයේදී ලබාගත් මාතා හරිගේ ඡායාරූපයක්



නෙදර්ලන්තය යනු පළමු ලෝක යුද සමයේදී අපක්ෂපාතී රටක් වූ අතර මාතා හාරී ඕලන්ද ජාතිකයෙක් මෙන්ම ප්‍රසිද්ධ පුද්ගලයෙක් වූ නිසාම දේශසීමා ඔස්සේ කිසිදු බාධාවකින් තොරව ගමන් කිරීමට අවස්ථාව උදා කරගත්තාය.ප්‍රංශය සහ ඕලන්දය අතර ගමන් කිරීමේදී සංග්‍රාම භූමිය මඟ හැරීමට ඇය ස්පාඤ්ඤය සහ බ්‍රිතාන්‍යය ඔස්සේ ගමන් මාර්ගය යොදාගෙන තිබිණි.රටකින් රටකට පහසුවෙන් ගමන් කල හැකිවීමත්,ප්‍රසිද්ධ චරිතයක් වීමත් නිසා සැක සිතන්නට තරම් කරුණු නැති නිසාත් ඇයව ඔත්තුකාරියක් ලෙස යොදාගන්නට ප්‍රංශය ක්‍රියාකලේය.නමුත් 1916 දී බ්‍රිතාන්‍යයේ අත් අඩංගුවට පත්වන ඈ පසුව නිදහස් කෙරේ.











ඇය ගැන දන්නා කියන අයට අනුව නම් මාතා හාරී යනු සමාජශීලී කාන්තාවකි.නමුත් ඔත්තු බැලීම වැනි කාර්යයක් සඳහා යොදාගන්නට තරම් ඇය බුද්ධිමත් නැතැයි ඔවුන්ගේ මතය විය.



1917 දී මැඩ්රිඩ් හි සිටි ජර්මන් හමුදාවේ නිලධාරියෙක් බර්ලිනයට රේඩියෝ පණිවුඩයක් යවයි.ඉන් කියවුනේ ජර්මන් ඔත්තුකාරයෙක්ගේ කේත නාමයක් වන H-21 මගින් ලබාදුන් ප්‍රයෝජනවත් තොරතුරු ගැනයි.ප්‍රංශ බුද්ධි අංශ විසින් H-21 යනු මාතා හාරි බව හඳුනා ගනියි(මෙම පණිවුඩය අනාවරණය කරගත්තේ බ්‍රිතාන්‍ය බුද්ධි අංශ විසින් බවද කියවේ).



මාතා හාරිගේ නිරුවත් රංගනය පිරිමින්ගේ ආකර්ෂණය දිනා ගත් අතර ලැබුණු ජනප්‍රියත්වය ඇයට ඉහළ ජන සමාජයට ඇතුළුවන්නට ඉඩකඩ විවර කලේය






මාතා හාරී ප්‍රංශය සහ ජර්මනිය යන දෙරට වෙනුවෙන්ම ඔත්තු බලන බව හෙළිවීමත් සමග 1917 පෙබරවාරි 13දා ප්‍රංශයේ පැරිස් හි හෝටයක උදෑසන ආහාරය ගනිමින් සිටි මාතා හාරිව අත්අඩංගුවට ගනියි.ඇයව සිරබාරයට පත්කර මාස කිහිපයකට පසුව 1917 ජූලි 24 දා නඩු විභාගයට ඉදිරිපත් කෙරේ.ඇය ජර්මනියට සැපයූ තොරතුරු නිසා සෙබලුන් 50,000කට පමණ ජීවිත අහිමිවූ බවට එහිදී චෝදනා එල්ල විය.නමුත් මාතා හාරී ජර්මනිය වෙනුවෙන් ඔත්තු බැලූබවට සැලකියයුතු සාක්ෂි ඉදිරිපත් කරන්නට බ්‍රිතාන්‍ය හෝ ප්‍රංශ බුද්ධි අංශවලට නොහැකිවිය.පසුව ඇගේ කාමරයේ තිබී රහස්‍ය තීන්ත හමුවී තිබේ.ඔත්තුකරුවන් විසින් යොදාගන්නා එවැනි තීන්ත වර්ගයක් හමුවීම එම කාලයේ හැටියට ප්‍රබල සාක්ෂියකි.නමුත් ඇය කීවේ ඒවා තමන්ගේ වේශනිරූපණ කටයුතු සඳහා යොදගත් දෙයක් බවයි.පැරිසියේ ඕලන්ද තානාපති වෙත ලිපි කිහිපයක්ම ඇය විසින් යවා තිබේ.ඒ තමන් නිර්දෝෂී බව ප්‍රකාශ කිරීමටයි.

මාතා හාරි අත්අඩංගුවට පත්වූ අවස්ථාවේදී ලබාගත්තා යැයි කියන ඡායාරූපයක්



නමුත් 1970 දශකයේදී එළිදරව් කල ලේඛනවලට අනුව මාතා හාරී යනු සැබවින්ම ජර්මන් ඔත්තුකාරියකි.එම ලේඛනවලට අනුව ඇය ජර්මන් secret service හා සම්බන්ධව ඇත්තේ 1915 වසරේදීය.ඇයට එහිදී ලබාදී තිබූ නාමය H-21ය.


මරාදැමීමට පෙර ලබාගත්තායැයි කියන මාතා හාරිගේ සේයාරුවක්(වයස අවුරුදු 41දී)



1917 ඔක්තෝම්බර් මස 15 දා මාතා හාරි නම් නාටිකාංගනාව,වෙශ්‍යාව සහ දෙපිට කාට්ටු ඔත්තුකාරිය ප්‍රංශයේදී වෙඩි තබා ඝාතනය කරන්නේ උසාවි නියෝගයට අනුවයි.ඒ වන විට මැය 41 වන වියේ පසුවිය.මරණයෙන් පසු ඇගේ මල සිරුර භාරගැනීමට පවුලේ කිසිවෙක් ඉදිරිපත් නොවූ බවත් එය වෛද්‍ය අධ්‍යයන කටයුතු සඳහා යොදාගත් බවත් කියවේ.

මාතා හාරි වෙඩි තබා ඝාතනය කරන ස්ථානයේදී ගත්තා යැයි කියන ඡායාරූපයක්




නෙදර්ලන්තයේ Leeuwarden නගරයේ නිර්මාණය කර ඇති මාතා හාරිගේ පිළිරුවක්






මාතා හාරිගේ චරිතය මුල් කරගෙන නිර්මාණය කල චිත්‍රපට



Mata Hari (1931)




Mata Hari, Agent H21 (1964) 




Mata Hari (1985)







Source:wikipedia.com
Double agent - මාතා හාරි Double agent - මාතා හාරි Reviewed by HarshaLulzSec on September 05, 2017 Rating: 5

නූතන ගිනි අවි-3

September 05, 2017
නූතන ගිනි අවි ලිපියේ තුන්වන කොටස ඉදිරිපත් කරන්නයි මේ සූදානම් වන්නේ.මෙහිදී Magpul FMG-9 සහ Armatix iP1 යන අවි සම්බන්ධව කතා කරනු ඇති.




Magpul FMG-9



Magpul FMG-9 යනු අලුත් පරම්පරාවේ submachine gun අවියකි.එය නිපදවා තිබෙන්නේ නම් Magpul Industries සමාගම විසිනි.ඒ 2008 වසරේදීය.මෙම අවිය ඇකිලිය හැකි අයුරින් නිපදවා තිබේ.එය ඇකිලූ පසු දිස්වන්නේ ෆ්ලෑස්ලයිට් එකක් ආකාරයෙනි.ලැප්ටොප් පරිඝණකයක බැටරිය පෙනුම සහිත නිසා ගිනිඅවියක් යැයි කිසිවෙකුට සැක සිතෙන්නේද නැත.අවිය නිපදවා තිබෙන්නේ ලෝහ යොදාගෙන නොව බරින් අඩු බහුඅවයවික වලිනි.කි.ග්‍රෑ.1/2ක් පමණ බරකින් යුක්තවන නිසා එය පහසුවෙන් ගෙන යා හැකිය.අවිය දිග හැරිය විට අඟල් 19 පමණ වන අතර ඇකිලූ විට අඟල් 10 පමණ දිගකින් යුක්තය.FMG-9 අවිය සඳහා යොදාගන්නේ 9×19mm Parabellum උණ්ඩයි.


Magpul FMG-9 අවිය ඇකිලූ පසු පෙනුම




Magpul FMG-9 අවිය දිග හැරීම


















Armatix iP1


Armatix iP1 හෝ iP1 පිස්තෝලය නමින් හඳුන්වන මෙම අවිය Armatix නම් ජර්මන් සමාගම නිෂ්පාදනයකි.මෙහි ඇති විශේෂත්වය එය ක්‍රියාත්මක කල හැක්කේ එහි නියම හිමිකරුවාට පමණක් වීමයි.2006 වසරේ නිපදවූ මෙම පිස්තෝලය ඇමෙරිකාවේ සහ ජර්මනියේ භාවිතා කරන්නට පටන් ගන්නේ 2014 වසරේ පටන්ය.මි.මී.175ක් දිග ග්‍රෑම් 518ක් බර මෙම අවියට මීටර් 69 දුරින් වූ ඉලක්කයක් වෙත නිවැරදිව වෙඩි තැබීමේ හැකියාව තිබේ.මෙම පිස්තෝලයෙන් වෙඩි තැබීමට නම් ඒ සමග එන ඔරලෝසුව මීටර් 25ක් දුරින් වත් තිබිය යුතුය.




පිස්තෝලය සමග එන ස්මාට් වර්ගයේ අත් ඔරලෝසුව පිස්තෝලය සමග සන්නිවේදනය කරයි.ඒ රේඩියෝ සංඥා මගිනි.හිමිකරු සතු PIN code එකක් ඔරලෝසුවට සැපයීමෙන් පසුව පිස්තෝලය ක්‍රියාත්මක කල හැකිය.ඔරලෝසුවේ අඩංගු තොරතුරු වන්නේ ආරෝපණ මට්ටම,දී ඇති කාලයකදී තැබූ වෙඩි ගණන ආදියයි.ඉලක්කය නියමිත දුර ප්‍රමාණයෙන් පිටත නම් තිබෙන්නේ වෙඩි තැබීම ස්වයංක්‍රීයව අක්‍රීය වේ.







හතරවන කොටසින් හමුවෙමු



Source:Businessinsider.com
නූතන ගිනි අවි-3 නූතන ගිනි අවි-3 Reviewed by HarshaLulzSec on September 05, 2017 Rating: 5

ඇමෙරිකානු ජනපති ප්‍රවාහන සේවා-2

September 05, 2017


එක්සත් ජනපදයේ ජනාධිපතිවරයාගේ ගමන් බිමන් වෙනුවෙන් යොදාගන්නා වාහන සම්බන්ධව පළ කල ලිපියේ දෙවන කොටස ඉදිරිපත් කරන්නයි මේ සූදානම් වන්නේ.මෙහි පළමු කොටසින් කතා කලේ ජනපති නිල මෝටර් රථය සහ බස් රථය ගැනයි.මෙම කොටසින් ජනාධිපතිවරයා ගුවන් ගමන් සඳහා යොදාගන්නා ගුවන් යානය සහ හෙලිකොප්ටරය ගැන තොරතුරු අනාවරණය කෙරේ.





Air Force One - එක්සත් ජනපදයේ ජනපති නිල ගුවන් යානය



ඇමෙරිකා එක්සත් ජනපදයේ ජනපතිවරයා ඇතුලුව ඉහළ පෙළේ නිලධාරීන් විදේශ සංචාර සහ රට ඇතුලත දිගු දුර ගමන් සඳහා යොදාගන්නා ජම්බෝ ජෙට් යානය Air Force One නමින් හඳුන්වයි.ගොඩබිම සියලු ස්ථාන සතුරු ප්‍රහාරවල අවධානමට ලක්ව ඇත්නම් මෙම ගුවන් යානය ජංගම බංකරයක් ලෙස ක්‍රියාත්මක වේ.ඒ නිසාම එය පියාඹන ධවල මන්දිරය යන නමින් හඳුන්වයි.Air Force One යනු විශේෂිත ගුවන් යානයක් වුද එහි නියම නම Air Force One නොවේ.Air Force "One" නමින් හඳුන්වන්නේ ජනපතිවරයා ගෙන යන ගුවන් යානය නිසාය.එසේම ඔහු වෙනුවෙන් තිබෙන හෙලිකොප්ටරයද Marine One නමින් හඳුන්වයි.ජනපතිවරයා ගුවන් හමුදා යානයකින් ගමන් කරන්නේ නම් එය Army One නමින් හඳුන්වයි.

අද වනවිට මෙවැනි වර්ගයේ ගුවන් යානා දෙකක් සේවයේ යොදවා තිබේ.ඒවා බොයින් 747-200B වර්ගයට සමානය.මෙම යානා තට්ටු හයක ගොඩනැගිල්ලක් තරම් උසය.ජෙනරල් ඉලෙක්ට්‍රික් සමාගමේ CF6-80C2B1 ජෙට් එන්ජින් හතරක් සහිත මෙම ගුවන් යානා පැයට සැතපුම් 700ක පමණ වේගයකින් ගමන් කරයි.ඒවාට අඩි 45,100 ක උසකින් ගමන් කල හැකි යැයි සැලකේ.එක් ගුවන් යානයකට ඉන්ධන ගැලුම් 53,611 සමග සම්පුර්ණ බර රාත්තල් 833,000ක් සහිතව පියාසර කල හැකිබවත් සම්පුර්ණයෙන්ම ඉන්ධන පිරවූ පසු ලෝකය වටා වට භාගයක් ගමන් කල හැකිබවත් කියවේ.


Air Force One යානය තුල වර්ග අඩි 4000ක ඉඩක් තිබෙන අතර එය මගී ගුවන් යානයකට වඩා හෝටලයක් හෝ විධායක නිලධාරියෙක්ගේ කාර්යාලයකට සමානය.යානයේ යට තට්ටුව බඩුබාහිරාදිය වෙනුවෙන් වෙන් කර තිබේ.මගීන් සඳහා කාමර සහ ඉඩකඩ වෙන්කර ඇත්තේ මැද තට්ටුවේය.ඉහළම තට්ටුව සන්නිවේදන උපාංග සඳහා වෙන් කර තිබේ.ජනපතිවරයාට අවශ්‍ය නිදන කාමරයක්,නාන කාමරයක්,කාර්යාලයක් සහ අනෙකුත් පහසුකම් වෙන්කර තිබේ.ගුවන් යානය තුල ඇති ගෘහ භාණ්ඩ සියල්ල දක්ෂ වඩුවන් ඔවුන්ගේ අතින්ම නිමකල ඒවාය.කාර්යය මණ්ඩලයට රැස්වීමට තිබෙන විශාල සම්මන්ත්‍රණ ශාලාව ජනපතිගේ කෑම කාමරය මෙන් දෙගුණයක් විශාල් බව පැවසේ.ජේ‍යෙෂ්ඨ කාර්ය මණ්ඩල සාමාජිකයන්ට ඔවුන්ගේම කාර්යාල ප්‍රදේශයක්ද අනෙකුත් පිරිසට වෙනම කොටසක්ද වෙන්කර තිබේ.ජනාධිපතිවරයා සමග සංචාරය කරන වාර්තාකරුවන්ට වෙනම ප්‍රදේශයක්ද තිබේ.Air Force One යානය තුල මගීන් 70ක් සහ කාර්ය මණ්ඩල සාමාජිකයන් 26ක්ද ගෙන යා හැකිය.


මෙම ගුවන් යානයේ සමහර ප්‍රදේශවලට දේශපාලනඥයින් සහ මාධ්‍යවේදීන්ට ඇතුලුවීම තහනම්ය.එසේම යානයේ ඇතුලත සැලැස්ම සඟවා තැබීමට ආරක්ෂක අංශ කටයුතු කර තිබේ.හෙළිවී තිබෙන තොරතුරුවලට අනුව යානයේ තට්ටු තුනකි.යානයට ඇතුලුවීමට දොරවල් තුනක් තිබෙන බව කියවේ.

-කාර්ය මණ්ඩලය සඳහා වෙන්කල කොටස

-මුළුතැන්ගෙය

-සම්මන්ත්‍රණ සහ කෑම කාමරය

-ජනපතිගේ කාමරය සහ කාර්යාලය

-සේවක මණ්ඩලයේ අවශ්‍යතා සඳහා වෙන්කල කොටස(නිදන කාමර)




එහි සන්නිවේදන කාමරයක්,සෝපාවක් සහිත කොටසක් සහ නියමු කුටියක්ද තිබේ.ගුවන් යානයෙන් කරන සමහර සංචාර දීර්ඝ ඒවා වන නිසා යානයට විශේෂාංග එක් කර තිබේ.ඒවා කිසිවක් සාමාන්‍යය වාණිජ මගී ගුවන් යානාවල දක්නට නොලැබේ.කාර්ය මණ්ඩයක මගින් යානයේ තිබෙන මුළුතැන්ගෙවල් දෙකෙහි ආහාර පිසීම සිදුකරයි.යානයේ පහල කොටසේ තිබෙන ශීතකරණ තුල ආහාර විශාල ප්‍රමාණයක් ගබඩා කර තිබේ.ඔවුන්ට වරකට පුද්ගලයන් 100කට ප්‍රමාණවත් ආහාර වේලක් පිළියෙල කිරීමේ පහසුකම තිබේ.මෙහි දියුණු වෛද්‍ය පහසුකම් සහිත කාමරයක් තිබේ.ඒ සඳහා වෙනම වෛද්‍යවරයෙක් ගුවන් යානයේ ගමන් කරයි.යානය තුල පහල සිට ඉහල තට්ටු වෙත යෑමට තරප්පුපෙලක් තිබේ.එසේම භාණ්ඩ පැටවීමට අවශ්‍ය උපකරණද තිබේ.

ගුවන් යානය සතුව දුරකතන 85ක් ,රේඩියෝ යන්ත්‍ර,ෆැක්ස් යන්ත්‍ර සහ පරිඝණක තිබේ.රූපවාහිනී යන්ත්‍ර 19ක්ද යානය පුරා සවිකර තිබේ.ගොඩබිම සිටින ඕනෑම අයෙක් හා සම්බන්ධ විය හැකි දුරකතන පද්ධතියක්ද එය සතුව.ගුවන් යානය පුරා ඇද තිබෙන වයර් සහ ඉලෙක්ට්‍රොනික් උපාංග විද්‍යුත්චුම්භක ස්පන්දන සහිතව සිදුවන න්‍යෂ්ඨික පිපිරීමකින් ආරක්ෂාව වන අයුරින් නිර්මාණය කර තිබේ.මෙම යානයේ තිබෙන තවත් විශේෂත්වයක් වන්නේ ගුවන් ගතව සිටියදී ඉන්ධන පුරවාගැනීමේ හැකියාවයි.යානයේ ආරක්ෂාව වෙනුවෙන් යොදා තිබෙන සමහරක් ක්‍රමෝපායන් රහසිගතය.සතුරු රේඩාර් අවහිර කිරීමේ තාක්ෂණයද එය සතුය.තාප සංවේදී මිසයිලවලින් ගැලවීමට ඊට හැකියාව තිබෙන බව කියවේ.

නිල ගුවන් යානය තුලදී ජනපති වශයෙන් ලින්ඩන් ජෝන්ස් දියුරුම් දෙන අයුරු



සෑම ගුවන් ගමනක්ම හමුදා මෙහෙයුමක් හා සමානවම රහසිගතය.ගුවන් ගමනකට පෙර එම යානයේ ක්‍රියාකාරීත්වය සම්බන්ධව මේරිලෑන්ඩ් හි ඇන්ඩෲ ගුවන් හමුදා කඳවුරේදී පුර්ණ අධීක්ෂණයකට ලක් කෙරේ.සියල්ල නිවැරදි නම් නම් හෙලිකොප්ටරයෙන් ජනපතිවරයා ධවල මන්දිරයේ සිට ඇන්ඩෲ ගුවන් හමුදා කඳවුරට රැගෙන එයි.


ඇන්ඩෲ ගුවන් හමුදා කඳවුර



ඇමෙරිකානු ජනපතිවරයා ගුවන් ගමනක් සඳහා පැමිණෙන්නේ න්‍යෂ්ඨික මිසයිල මුදා හැරීමට අවශ්‍ය අවසරය ලබාදෙන කේත සමගයි.ඒවා අඩංගුවන්නේ විශේෂ පෙට්ටියක් තුලයි.ගුවන් ගමන අතරතුර එය භාරවන්නේ ගුවන් හමුදා නිලධාරියෙකුටය.සාමාන්‍ය මගී ගුවන් යානයක මෙන්ම මෙහි කාර්ය මණ්ඩලයටද වෙන වෙනම කාර්යයන් පැවරී තිබේ.ගුවන් යානය පාලනය,ජනපතිගේ ආරක්ෂාව,යානයේ පිරිසිදු කිරීම්,ආහාර පිළියෙල කිරීම් ආදිය සඳහා වෙන වෙනම පිරිස් සිටියි.කාර්යමණ්ඩලය වෙනුවෙන් තෝරාගන්නේ හමුදාවේ ආදර්ශමත් ඉතිහාසයක් සහිත පිරිස්ය.

හැරී ටෲමන් ජනාධිපතිවරයා 1945 වසරේදී නිල ගුවන් යානයෙන් බසින අයුරු



දෙවන ලෝක යුද සමය වන තෙක් එක්සත් ජනපද ජනපතිවරු විදේශ සංචාරවල යෙදුණේ ඉතා කලාතුරකිනි.නමුත් ගුවන් ගමන් වල සිදුවූ දියුණුවත් සමග එම තත්ත්වය ක්‍රමයෙන් වෙනස් විය.1934 වසරේදී පළමුවරට ගුවන් මගින් ගමන් කල පළමු ඇමෙරිකානු ජනපතිවරයා බවට පත්වන්නට ෆ්‍රෑන්ක්ලීන් රූස්වෙල්ට හැකිවිය.අයිසන්හවර් ජනපතිගේ පාලන කාලයේදී බොයින් 707 ජෙට් යානයක් ගමන් බිමන් වෙනුවෙන් යොදාගැනීම ආරම්භ කල අතර එය නමින් හඳුන්වා දෙන ලදි.1990 පටන් නිල ගුවන් යානය ලෙස බොයින් 747 යානයක් යොදා ගැනීම ඇරඹිණි.


යානය අඩි 232 ක දිගකින්ද අඩි 63ක උසකින්ද යුක්තය.පියාපතක දිග අඩි 195කි.





ජනාධිපතිවරයාට වෙන් කල කොටසේ නිදන කාමර,නාන කාමරයක්,වැසිකිලියක් සහ කුඩා ව්‍යායාම ශාලාවක් අඩංගුය.යානය ගමන් කරද්දී ඉන්ධන පුරවා ගැනීමට හැකි අයුරින් නිර්මාණ කර තිබේ.







ඊට අධෝරක්ත සංවේදක මිසයිල මඟ හැරීමේ හැකියාව තිබෙන බව කියවේ.






යානය සතුව සතුරු රේඩාර් අවහිර කිරීමේ තාක්ෂණයද තිබේ.






යානයේ බඳ න්‍යෂ්ඨික පිපිරීමකට ඔරොත්තු දෙන ලෙස නිමවා ඇත.






මෙහි තට්ටු තුනක් තිබෙන අතර ඉදිරිපස කොටසේ දොරවල් දෙකක් තිබේ.






එය සතුව වෙනමම තරප්පු පෙලක් තිබෙන නිසා ගුවන් තොටුපොලේ සහාය අවශ්‍ය නොවේ.





යානය ඇතුලත වර්ග අඩි 4000ක් ඉඩක් තිබේ.එහි මගීන් 76ක් ගෙන යා හැකිය.






සාකච්ඡා සඳහා වෙන්කර තිබෙන මෙම කාමරයේ බාහිර පුද්ගලයන් ආයතන හා වීඩියෝ සංවාද පැවැත්විය හැකි රූපවාහිනියක්ද තිබේ.






ජනපතිවරයාගේ කාර්යාලය





සෑම ජනේලයක්ම වෙඩි නොවදින ලෙස නිර්මාණය කර තිබේ.බොහෝමයක් ගෘහභාණ්ඩ මනා නිමාවකින් යුක්තය.






යානය පුරා රූපවාහිනී යන්ත්‍ර 20ක් තිබේ.






ඒ තුල දුරකතන 85ක් තිබේ.






සුදු පැහැති දුරකතන රහස්‍යය පරිහරණය සඳහාය.ලා දුඹුරු පාට ඒවා ආරක්ෂිත සංවාද වෙනුවෙන් වේ.






යානයේ කාර්ය මණ්ඩලය 26 පමණ වේ.








Marine One - ජනපතිගේ නිල හෙලිකොප්ටරය



ඇමෙරිකානු ජනපතිවරයාගේ රටතුල සංචාර සඳහා යොදාගන්නා හෙලිකොප්ටරය Marine One නමින් හඳුන්වයි.උප ජනපතිවරයා යොදාගන්නා හෙලිකොප්ටරය Marine Two යන නමින් හඳුන්වයි.පළමුවරට ජනපතිවරු ප්‍රවාහනයට හෙලිකොප්ටර් යොදාගන්නේ 1957 දීය.ඒ අයිසන්හවර් ජනාධිපතිවරයා වෙනුවෙන් Bell UH-13J Sioux යානයයි.1958 දී Sikorsky H-34 හෙලිකොප්ටරය ආදේශ කෙරිණි.1961දී VH-3A හෙලිකොප්ටරය යොදාගන්නා ලදි.1987 පටන් VH-60N වර්ගයේ හෙලිකොප්ටරයක් යොදාගෙන තිබේ.


හෙලිකොප්ටරය ඇතුලත සැකැස්ම








මෙම හෙලිකොප්ටරය අඩි 16යි අඟල් 10 උසය.දිගින් අඩි 72 අඟල් 8ක් වේ






මෙම යානය පදවන්නේ HMX-1 "Nighthawks" නම් ගුවන් නියමුවන් කණ්ඩායමයි.






ඊට පැයට සැතපුම් 150ක වේගයෙන් ගමන් කල හැකිය.





එහි එන්ජින් තුනෙන් එකක් අක්‍රීය වුවත් ඊට පියාසර කිරීමට හැකිය.






ඊට වෙඩි නොවදින ආවරණයක්,මිසයිල ආරක්ෂණ පද්ධතියක් තිබේ.






පෙන්ටගනය සහ ධවල මන්දිරය සමග රහස්‍යය සංවාදයක් කිරීමට අවශ්‍ය දුරකතන සම්බන්ධතාවයක් හෙලිකොප්ටරය සතුය.






එය කොතැනක ගොඩබෑවද මැරීන් භටයෙක් විසින් ජනාධිපතිවරයාට ආචාර කරයි.






Marine One සමග ඊට සමාන තවත් හෙලිකොප්ටරයක් ගමන් කරයි.






අනෙක් හෙලිකොප්ටර් මෙන් නොව Marine One යානය සාපේක්ෂව ශබ්දයෙන් අඩු එකක් නිසා ජනපතිවරයාට සාමාන්‍ය පරිදි අන් අය සමග සංවාදයේ යෙදිය හැකිය.







එය ඇතුලත වර්ග අඩි 200ක ඉඩක් තිබේ.






මගීන් 14 දෙනෙකුට ඒ තුල ගමන් කල හැකිය.






යානය රට තුල සහ පිටත ගමන් සඳහා යොදාගත හැකිය.







Source:Businessinsider.com
ඇමෙරිකානු ජනපති ප්‍රවාහන සේවා-2 ඇමෙරිකානු ජනපති ප්‍රවාහන සේවා-2 Reviewed by HarshaLulzSec on September 05, 2017 Rating: 5
Powered by Blogger.